(ភ្នំពេញ)៖ លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា បានលើកឡើងថា នាវាចម្បាំងរបស់កងទ័ពជើងទឹករុស្ស៊ី មានប្រពៃណីនៃការមកទស្សនាកំពង់ផែកម្ពុជាជារៀងរាល់ឆ្នាំ ដែលរួមចំណែកដល់ការពង្រឹង និងអភិវឌ្ឍចំណងមិត្តភាពយោធាយ៉ាងជិតស្និទ្ធ។
លោកបានលើកឡើងបែបនេះ នៅព្រឹកថ្ងៃទី៦ ខែមេសា ឆ្នាំ២០២៦ ក្នុងឱកាសនាវាចម្បាំងរបស់រុស្ស៊ីចំនួន ២គ្រឿង បានចូលចតនៅកំពង់ផែស្វយ័តក្រុងព្រះសីហនុ ដើម្បីបំពេញទស្សនកិច្ចរយៈពេល ៣ថ្ងៃនៅកម្ពុជា។ ការមកដល់របស់នាវាចម្បាំងទាំងពីរគ្រឿង ត្រូវបានស្វាគមន៍យ៉ាងកក់ក្តៅពីសំណាក់ឧត្តមនាវីត្រី អុិន សុខេមរា មេបញ្ជាការរងមូលដ្ឋានសមុទ្ររាម ជាមួយកងទ័ពជើងទឹករបស់កម្ពុជាចំនួន ៦០នាក់ ដោយមានការចូលរួមពីលោក Anatoly Borovik ផងដែរ។
ក្នុងសុន្ទរកថារបស់ខ្លួន ជាដំបូងលោកឯកអគ្គរដ្ឋទូត បានស្វាគមន៍សមមិត្តនាវិកនៃកងនាវាប៉ាស៊ីហ្វិក មកកាន់ព្រះរាជាណាចក្រកម្ពុជា ដែលជាប្រទេសមួយដែលជាមិត្តដ៏យូរអង្វែងរបស់សហព័ន្ធរុស្ស៊ី។
លោក Anatoly Borovik បានបន្តថា មេបញ្ជាការ និងសមាជិកនាវិកមួយចំនួននៃនាវានៃកងនាវាប៉ាស៊ីហ្វិកដ៏រុងរឿង ធ្លាប់បានមកទស្សនាប្រទេសនេះពីមុន ហើយបានទទួលការស្វាគមន៍យ៉ាងកក់ក្តៅពីកងកម្លាំងកងទ័ពជើងទឹក និងប្រជាជនកម្ពុជា។ ពួកគេត្រូវបានទទួលស្វាគមន៍ដោយការចូលជួបសម្តែងការគួរសមពីថ្នាក់ដឹកនាំនៃក្រសួងការពារជាតិ និងបញ្ជាការដ្ឋានកងកម្លាំងប្រដាប់អាវុធ។
បើតាមលោក Anatoly Borovik ឆ្នាំនេះគឺជាខួបលើកទី៧០ នៃការបង្កើតទំនាក់ទំនងការទូតរវាងប្រទេសយើងទាំងពីរ ដែលជាព្រឹត្តិការណ៍សំខាន់មួយក្នុងប្រវត្តិសាស្ត្រនៃកិច្ចសហប្រតិបត្តិការទ្វេភាគីរបស់យើង។ ទំនាក់ទំនងរវាងរដ្ឋទាំងពីរគឺផ្អែកលើមិត្តភាព សាមគ្គីភាព និងភាពជាដៃគូរយៈពេលវែងដែលបានបង្កើតឡើងជាប្រវត្តិសាស្ត្រ។ ទំនាក់ទំនងនេះបាននិងកំពុងអភិវឌ្ឍឥតឈប់ឈរ ដោយកិច្ចសហប្រតិបត្តិការទ្វេភាគីកំពុងពង្រីកនៅក្នុងវិស័យសំខាន់ៗជាច្រើន រួមទាំងការពារជាតិ និងសន្តិសុខ។ អ្នករួមចំណែកយ៉ាងសំខាន់ចំពោះការងារនេះ ដោយជួយពង្រឹងចំណងមិត្តភាពរវាងកងកម្លាំងកងទ័ពជើងទឹករបស់យើង។
ឆ្លៀតឱកាសនេះ លោក Anatoly Borovik បានថ្លែងអំណរគុណយ៉ាងជ្រាលជ្រៅចំពោះនាយទាហាន និងនាវិកទាំងអស់ ចំពោះការប្តេជ្ញាចិត្តរបស់ពួកគេចំពោះបេសកកម្មដ៏សំខាន់ក្នុងការធានាសន្តិសុខ និងការពារផលប្រយោជន៍របស់សហព័ន្ធរុស្ស៊ី។
លោកសង្ឃឹមថាអ្នកទាំងអស់គ្នានឹងបង្ហាញពីគុណសម្បត្តិល្អបំផុត ដែលមាននៅក្នុងកងទ័ពជើងទឹករុស្ស៊ី ដោយមានសមត្ថភាពដោះស្រាយភារកិច្ចស្មុគស្មាញក្នុងកាលៈទេសៈណាក៏ដោយ និងបម្រើជាគំរូ។ ពួកគេចាំបាច់ត្រូវធ្វើអ្វីគ្រប់យ៉ាងដែលអាចធ្វើទៅបាន ដើម្បីធានាថាទង់ជាតិ St. Andrew តែងតែហើរដោយមោទនភាពឆ្លងកាត់មហាសមុទ្រពិភពលោក។
ដោយដឹងថាថ្ងៃឈប់សម្រាកដ៏ធំមួយនៅថ្ងៃទី២១ ខែឧសភា ដែលជាខួបនៃការបង្កើតកងនាវាប៉ាស៊ីហ្វិកកាន់តែជិតមកដល់ហើយនោះ លោក Anatoly Borovik បានជូនពរឱ្យអ្នកទាំងអស់គ្នាវិលត្រឡប់ទៅកាន់កំពង់ផែកំណើតរបស់អ្នកនៅ Vladivostok ដោយសុវត្ថិភាព ជាកន្លែងដែលអ្នកអាចជួបជុំជាមួយក្រុមគ្រួសាររបស់អ្នក សាច់ញាតិជិតស្និទ្ធ និងជាទីស្រឡាញ់របស់អ្នក។ លោកក៏បានជូនពរឱ្យអ្នក នាវិកនៃកងនាវាប៉ាស៊ីហ្វិកដ៏រុងរឿង ស្នាក់នៅប្រកបដោយផ្លែផ្កានៅកម្ពុជា ការបំពេញភារកិច្ចដែលកំណត់ដោយបញ្ជាការសម្រាប់យុទ្ធនាការនេះ និងភាពជោគជ័យជាបន្តបន្ទាប់ក្នុងការបម្រើ និងជីវិត។
សូមជម្រាបថា នាវាចម្បាំងរបស់រុស្ស៊ី ដែលចតនៅកម្ពុជា គឺពីថ្ងៃទី៦ ដល់ទី៨ ខែមេសា ឆ្នាំ២០២៦នេះ រួមមាន នាវា Sovershenny លេខ៣៣៣ និងនាវា Rezky លេខ៣៤៣។ នាវាចម្បាំងទាំងពីរគ្រឿងនេះ ដឹកនាំដោយមេបញ្ជាការ លោកវរនាវីឯក SHMAGIN Artem និងមេបញ្ជាការ លោកវរនាវីឯក KOVALEV Evgenii ហើយមាននាវិកសរុបប្រមាណ ២៦២នាក់។
នាវាចម្បាំង Sovershennyy ដាក់ដំណើរការកាលពីឆ្នាំ២០១៧។ វាជានាវាចម្បាំងប្រភេទ corvette ថ្នាក់ Steregushchy-class ទម្ងន់២២០០តោន ប្រវែង១០៤ម៉ែត្រ ដើរដោយម៉ាស៉ីនម៉ាស៊ូត និងល្បឿន៤៨គីឡូម៉ែត្រ ក្នុងមួយម៉ោង។ នាវាចម្បាំងនេះ មានបំពាក់ប្រព័ន្ធរ៉ាដា និងមីស៉ីលចម្រុះ ហើយមានកន្លែងសម្រាប់ឱ្យឧទ្ធម្ភាគចក្រអាចចុះចតបាន។
នាវាចម្បាំង Rezky ដាក់ដំណើរការកាលពីឆ្នាំ២០២៣។ វាមានលក្ខណៈបច្ចេកទេស ស្រដៀងគ្នាទៅនឹងនាវាចម្បាំង Sovershennyy ដែរ ដោយសារជានាវាប្រភេទ corvette ស្ថិតក្នុងថ្នាក់ Steregushchy-class ដូចគ្នា។ ពួកវាមានតម្លៃខ្ទង់ ១២០-១៥០លានដុល្លារក្នុងមួយគ្រឿង។
គួរជម្រាបដែរថា ដំណើរទស្សនកិច្ចរបស់កងទ័ពជើងទឹករុស្ស៊ី និងនាវាចម្បាំងទាំងពីរគ្រឿងនេះ គឺជាកម្មវិធីមួយ ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យការពារជាតិរវាងកម្ពុជា និងរុស្ស៊ី ដែលប្រទេសទាំងពីរតែងប្រកាន់យកក្នុងប្រវត្តិនៃទំនាក់ទំនង។
ក្រោយពេលចូលចតនៅកម្ពុជាហើយនោះ តាមកម្មវិធីដែលបានគ្រោងទុក មេបញ្ជាការ និងនាវិកនៅលើនាវានឹងបំពេញទស្សនកិច្ចនៅក្នុងខេត្តព្រះសីហនុ ដោយមានការចូលជួបសម្តែងការគួរសមជាមួយថ្នាក់ដឹកនាំខេត្តព្រះសីហនុ និងឧត្តមនាវីទោ ម៉ី ឌីណា មេបញ្ជាការមូលដ្ឋានសមុទ្ររាម។
ក្រៅពីនោះ លោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិកម្ពុជា និងថ្នាក់ដឹកនាំនៃក្រសួងការពារជាច្រើនរូបទៀត ក៏នឹងអញ្ជើញទស្សនកិច្ចលើនាវាផងដែរ។ កម្មវិធីទស្សនកិច្ចនេះ ក៏រួមមានកម្មវិធីទស្សនានាវា ដោយសិស្ស និស្សិត និងលោកគ្រូអ្នកគ្រូ នៃសាលាស្ថានទូតរុស្ស៊ី។
ក្រៅពីនេះ ក្នុងឱកាសសំចតនៅកម្ពុជា កងទ័ពជើងទឹកកម្ពុជា និងរុស្ស៊ី ក៏មានលេងបាល់ទាត់មិត្តភាពផងដែរ។
សូមបញ្ជាក់ថា ដើម្បីពង្រឹងទំនាក់ទំនង និងកិច្ចសហប្រតិបត្តិការរវាងកម្ពុជា និងរុស្ស៊ី នាវាចម្បាំងរបស់រុស្ស៊ី បានមកចត និងទស្សនកិច្ចនៅកម្ពុជាជាបន្តបន្ទាប់។ កាលពីឆ្នាំ២០២៥ កំលុងខែមេសា និងឧសភា ក្រុមនាវាចម្បាំងរុស្ស៊ីជាច្រើនគ្រឿង បានចូលមកចតនៅកម្ពុជា រួមមាននាវាចម្បាំង Hero of the Russian Federation Aldar Tsydenzhapov និង Rezky រួមជាមួយនាវាផ្ទុកប្រេងធុនមធ្យម Pechenga នៅឯកំពង់ផែស្វយ័តព្រះសីហនុ។
របាយការណ៍បានបង្ហាញផងដែរថា គិតចាប់ពីឆ្នាំ២០១១មក នាវាចម្បាំងរុស្ស៊ី បានចូលចតនៅកម្ពុជា ចំនួន៨លើក ស្មើ១៨គ្រឿង៕
